الحقيقة ماينفعش اكمل الموضوع من غير الاشارة لمصدره ومن غير ما اشكر كل أصحاب الفضل بعد ربنا سبحانه وتعالي في اخراج الموضوع بالصورة دي
عايز أشكرالدكتور خالد يونس الخالدي
علي كتابه الرائع اليهود تحت حكم المسلمين في الاندلس
الحقيقة أنا استفدت منه كتير وجزاه الله خير علي المعلومات الوفيرة دي ورغم تعدد مصادري ورغم اني قرأت اكتر من مقال وكتاب في الموضوع ده الا ان الكتاب ده بالذات اثر فية بشكل كبير
و بالمرة بقي عايز أنبه علي نقطة في غاية الأهمية وهي
لما فتح المسلمون الأندلس،
*رفعوا الاضطهاد والذل عن اليهود،
*وعاد معظم المنصّرين إلى دينهم،
*وتعامل المسلمون مع اليهود بكل رفق
*وعلى وفق الأحكام الشرعية الخاصة بأهل الذمة،
*وسمحوا لهم بالبقاء على دينهم، وممارسة شعائرهم،
*وتركوا لهم حرية السكن بين المسلمين أو في أحياء خاصة بهم،
*وأتاحوا لهم مزاولة ما شاءوا من أنواع النشاط الاقتصادي،
*وحفظوا أرواحهم وأموالهم وحقوقهم،
*فشهدوا عدلاً وتسامحاً وحرية لم يعرفوها من قبل،
*وعاشوا أكثر من ثمانية قرون ينعمون بالحكم الإسلامي،
*ورأوا حضارة المسلمين السابقة المتميزة بين جمعها بين الإيمان والعلم،
*لذا حاول اليهود تقليدهم، فتكلموا بلغتهم، وتعلموا أدبهم وفكرهم وثقافتهم وعاداتهم
يعني م الاخر كدة ....
العرب ما قتلوش اليهود زي الغرب المسيحي
الغرب المسيحي اللي فضل 2000 سنة يقتل ويعذب ويشرد في اليهود
اليهود اللي لازم يبوسوا ايديهم وش وظهر ويحفظوا جميل المسلمين اللي خلصوهم من كابوس الرومان وذل القوط
اليهود اللي لازم يعرفوا ان لولا الاستقرار والحماية والأمان اللي شافوها مع المسلمين ماكانش يبقي ليهم دور في الفلسفة والعلم والطب عموما ...
مش هي دي النقطة اللي عايز اتكلم فيها طبعا
لكن عايز اقول ان اليهود بيروجوا لفكرة انهم هما اللي ساعدوا المسلمين في دخول الأندلس
وكتير من المؤرخين اليهود كتبوا في الموضوع ده زي مثلا سيمون دوبنوف اللي فتى وقال
"وتضمن الجيش الإسلامي الكتيبة البربرية اليهودية المنضمة إليهم، والتي يقودها المحارب الذي يحمل اسماً يهودياً وهو خولان اليهودي، الذي فتح الجزء الأكبر من قطلونيا"
أصلا اليهود ما شاركوش في فتح قطالونيا والحقيقة ان التاريخ ولا الجغرافيا يعرفوا واحد اسمه خولان
ده حتي اسمه عيب قوي ..!!
أما الأسبان ف بيقولوا وبيتهموا يهود الأندلس بالخيانة وبالاتصال بالمسلمين،وطالبوهم بفتح الأندلس، وانهم وعدوهم بتقديم المساعدة لهم مقابل تخليصهم من حكم القوط
والحقيقة تم الاعلان عن الاتهام ده لأول مرة من قبل الملك القوطى إجيكا، وذلك في مجلس طليطلة الكنسي المنعقد سنة (75 هـ - 894م)
والحقيقة بقي ان فيه 3 روايات بتتكلم عن الاتهام ده
الرواية الأولى بتقول
أن يهود الأندلس دخلوا في مفاوضات مع يهود أجانب في البلاد التي وراء البحر، لغرض التقدم نحو الشعب النصراني ( الشعب اليهودي يعني)
طب هما مين ؟
وفين ؟
وليه ؟
محدش عارف حاجة
والرواية الثانية بتقول
أن يهود الأندلس قد تفاوضوا مع الأفارقة
طب اي افارقة ؟
المسلمين منهم ولا اليهود ؟
البيض منهم ولا السود ؟
محدش فاهم حاجة
أما الرواية الثالثة بتقول
ان اليهود تفاوضوا مع "القوم الذين وراء البحر"
ايه ده ؟
يعني ايه ؟
هما مين ياعم الناس دي ؟
محدش داري بحاجة
لكن ممكن نطلع بحاجة من الالغاز الثلاثة دي وهي ان اليهود بشكل او بأخر اتصلوا واتفاوضوا بالمسلمين في شمال افريقيا .. ازاي ؟ طبعا معرفش .. عشان يشجعوهم علي غزو الاندلس او بمعني أدق عشان ينقلوا الأخبار دي للخلافة ومركز قيادة المسلمين في الشرق وبالتالي يتحمس المسلمين ويبعتوا جيش يغزو الاندلس ويفتحها
والحقيقة بقي كمان انا مش مع اللي بيقول ان اليهود اتفقوا مع المسلمين لغزو الاندلس لأسباب كتير منها
1-فين الدليل ؟ يعني مافيش مخطوطة ولا جواب ولا تدوينة
2-أساسا بقي المؤرخين الأسبان ماقدروش يحددوا هو اليهود تفاوضوا مع مين ؟؟ يعني مرة يقولوا مع يهود زيهم ومرة يقولوا مع افارقة ومرة يقولوا مع ناس من ورا البحر
3-اصلا المسلمين وقت مؤتمر طليطلة الكنسي سنة 75 هـ - 694 م كانوا لسة ما وصلوش للمغرب اللي فتحوها بعد كدة بـ 3 سنين علي الاقل سنة 78 هـ 697 م علي ايد حسان بن النعمان وموسي بن نصير
4-اصلا اليهود كانوا بيتعلقوا بقشاية وكانوا عايزين اي حد يخلصهم من الذل اللي هما فيه بأي شكل مسلمين بقى أو غيرهم مش مهم بس المهم يستريحوا من اللي بيحصلهم ده
5-تفتكر فعلا لو اليهود هما اللي ساعدوا المسلمين علي الغزو كانوا هيسكتوا ... دول كانوا زمنهم عملوا عيد وطني ليهم بالمناسبة دي والدليل انهم لما اتطردوا نهائيا من أسبانيا بوحي من الكنيسة في 2 أغسطس سنة 1492 م اتخذه اليهود يوما للحداد في حياتهم فمن باب أولي يحتفلوا بالناس اللي حرروهم
6-أصلا فكرة غزو الاندلس فكرة اسلامية مؤجلة من عهد الخليفة عثمان بن عفان رضي الله عنه وروي عن عثمان بن عفان رضي الله عنه أنه كتب إلى من انتدب إلى غزو الأندلس: وقال
" أمابعد فإن القسطنطينية إنما تفتح من قِبَلِ الأندلس، وإنكم إن استفتحتموها كنتم شركاء من يفتحها في الأجر، والسلام"،
ويقول ابن عذاري:
"أما دخول المسلمين لها فذكرفيه أربعة أقوال: أحدها أن الأندلس أول من دخلها عبد الله بن نافع بن عبد القيس وعبد الله بن الحصين الفهريّان من جهة البحر في زمن عثمان رضي الله عنه..."
7-حيلة مكشوفة اخر حاجة من الاسبان الصراحة ॥ أيوة ... يتهموا اليهود بالتأمر والتعامل مع المسلمين عشان يغطوا وكستهم وهزيمتهم الكبيرة رغم انهم كانوا اكثر في العدد والعتاد
8-اما تفسير ان المسلمين عاملوا اليهود كويس وبرفق وريحوهم ع الاخر بعد فتح الأندلس فده بقي عشان احنا دينا كدة أأأه دين كله رحمة وكله احترام للآخر واسألوا النصاري بعد فتح بيت المقدس ايه اللي حصلهم وأسألوهم بعد فتح مصر هتعرفوا اننا عندنا عقيدة بتحترم كل الديانات ولا فرق بين اليهودية والمسيحية في الاسلام لأنهم ديانات سماوية ولا فرق بين اليهودي والمسيحي لأنهم في الاخر أهل ذمة
9-اشمعني يعني يهود اسبانيا بالذات اللي ساعدوا المسلمين في دخول أسبانيا ؟ طيب ماهو يهود المانيا شافوا الويل ويهود فرنسا اتمسخروا واتذلوا ع الاخر ويهود انجلترا زي ماانتوا تابعتوا قد ايه اتبهدلوا وكام مرة يتطردوا يرجعوا ويتطردوا ويرجعوا ويتطردوا انا عايز افهم ليه الناس دي ماطلبتش من المسلمين ييجوا يخلصوهم
ليست هناك تعليقات:
إرسال تعليق