حركة موزس الكريتي

التدوينة السادسة

حركة موزس الكريتي

اهلا بيكم مرة تانية في مدونتي المتواضعة التاريخ قبل الطبيخ

النهاردة ان شاء الله هنكمل باقي الحركات اللي مهدت لقيام الصهيونية

وهي حركة موزس الكريتي

سنة 448 م تقريبا ادعى واحد يهودي من جزيرة كريت بأنَّه سيدنا موسى وأنَّه ربنا أرسله ليخلص اليهود ووعد أهل الجزيرة انه يأخذهم عن طريق البحر إلى فلسطين من غير مراكب ولا سفن حيث يفلق لهم البحر كما فلقه موسى عليه السلام

وقد ضرب لهم موعداً لذلك ولما جاءوا البحر نادى على البحر أن ينشق

يا بحر انشق لكن البحر ما انشقش !!

يا بحر انشق مافيش فايدة

الراجل حس إن الموضوع وسع وكبر منه قوي لكن هايعمل ايه

المهم أمرهم يقفزوا

هيلاااا

هيلاااا

هووووب

وفعلا الناس أطاعوه وقفزوا

منهم اللي غرق ومنهم اللي فلت بجلده ونجا أما هو اختفى طبعا ومحدش لاقيه لغاية دلوقتي ...

تفتكروا راح فين ؟ !

وعلي فكرة زي ما انتوا متابعيين كدة

فيه يهود كتيرعلي مر التاريخ ادَّعوا النبوة وقالوا انهم المسييح او الماشيح

مش بس شرقيين ..

لا في كمان يهود كتير في الغرب مشوا ورا نفس الفكرة وده بصراحة اللي حمسني وشجعني اكتب في الموضوع ده ان شاء الله في القريب العاجل ... ادينا بنتسلي ..

نروح لحركة تانية اسمها

الحركة العيسوية

ودي تزعمها واحد يهودي من ايران من مدينة أصفهان الراجل ده اسمه أبي عيسى اسحق بن يعقوب الأصفهاني أو عوفيد الوهيم أي عابد الله أو (عوبادياه)

الراجل ده ظهر في أوخر الدولة الأموية أيام الخليفة عبد الملك ابن مروان وكان بيشتغل خياط وكان أمي لا يقرأ ولا يكتب

وطبعا ادعي انه المسيح المنتظر وطبعا برضه صدقوه كتير من اليهود

والراجل ده بصراحةعمل فتنة كبيرة في وقته لأنه بدأ يدعوا أبناء طائفته انهم يعملوا كيان خاص بيهم ليه صفة سياسية وعقائدية

وكان من أهم بنود العقيدة العيسوية

1-اقرارهم بنبوة عيسي بن مريم وانه اعظم الأنبياء في نظرهم

2-اقرارهم بنبوة سيدنا محمد صلي الله عليه وسلم لكن علي العرب فقط

3-زعم ابو عيسي انه المسيح المخلص

4-قال كمان ان للمسيح خمسة رسل يأتون قبله واحداً بعد الآخر من بينهم عيسى ومحمد عليهما السلام

5-قال أن ربنا كلمه وأمره بتخليص اليهود من أيدي الأمم العاصية الظالمة

6-حرَّم أكل اللحمة وأي حاجة فيها روح وحرّم شرب الخمر وحرَّم الطلاق لأي سبب

7-خالف اليهود في كثير من أحكام شريعتهم

8-فرض علي اصحابة 7 صلوات في اليوم

المزمور 19/164 «سبع مرّات في النهار سبَّحتك على أحكام برّك» وأمر أصحابه بإقامتها،

9-قال ان استعادة فلسطين لن تتم الأ علي أسنة الرماح وجهز جيش عدده 10 ألف يهودي

و فضل علي الحال ده لغاية ما جاءت الدولة العباسية وتولي الخليفة أبو جعفر المنصور وروقه ع الاخر وهزمه وقضي علي حركته

فيه ناس قالوا ان أبو عيسي اتقتل

وفيه ناس قالوا انه راح واستخبي في كهف

وفيه ناس قالوا انه راح الصحرا يقابل هناك اليهود اتباع سيدنا موسي عشان يفكروا ويخططوا ويتكتكوا ويرجعوا بجيش كبير يستعيدوا بيه فلسطين

المهم انه من ساعتها محدش سمع عنه خبر

تفتكروا برضه راح فين ؟