هلل واستهبل واستعبط
واستعرض نفسك باللؤم
وافضل مستنكر ومندد
وممدد على كرسي الحُكم
ومسلِّم دقنك لـ كوهين
وسيادتك أرضك متَّاخدة
ومحتلة ومقسومة إتنين
وسعادتك عادتك معروفة
الشجب وضرب الكفين
وجنابك دايماً بتهاود
ومطاطى الراس والخدين
وجلالتك مبسوط بالكرسى
والحاشية الماشية فــ صفين
وعَظمتك ساكت ومسكِّت
الأمة بقالك قرنين
وفخامتك مش بس مطَبَّع
لأ ده انت مرَكِّب قرنين
وفضيلتك أصبحت موظف
واهى فرصة تطلع قرشين
ونيافتك جايب م الآخر
ومركِّب دايماً وشين
وسموك على أرضك قاعدة
بتوجه صواريخها لـ فين ؟
ومعالى الغالي مِكَبَّرها
ومنَفض ومغَمض عين
إخوانَّا مش لاقية اللُقمة
مع ذلك كرشك مترين
خليك متعلَّق بالكرسي
ومتعلَّق فى رقبتك دين
ليست هناك تعليقات:
إرسال تعليق