حركة شبتاي زيفى ( الجزء الثانى )

حركة شبتاى زيفى ( الجزء الثانى )

وهناك قابل ناثان بنيامين ، وده دجال برضه إدَّعى النبوة فى الوقت ده ، لكن تأثير شبتاي كان ليه مفعول السحرعلى الجميع بما فيهم ناثان اللى صدَّق شبتاي جداً ، وآمن بيه بصورة كبيرة ، لدرجة أن ناثان كان بيفسر كل سلوكيات شبتاي الغريبة في ضوء النصوص التوراتية ، يعني شبتاي عمل كدة عشان التوراة بتقول كدة  ، وشبتاي بيقول كدة عشان التوراة فيها كدة ....

حتى إن ناثان أقنع شبتاي إن الوقت بقي مناسب  عشان يطلع على الناس ويقولهم انه المسيح المنتظر  ، وابتدي ناثان يمهد الطريق لـ شبتاي بكل الوسائل ، واستخدم الحيل والألاعيب الغريبة والطريفة فى نفس الوقت عشان يقنع الناس إن شبتاي هو المسيح ،

 ومن الحيل دى ان فى ليلة من الليالي كان ناثان قاعد بينشد ويدعى وماكنش شبتاي موجود ، وفجأة أغمى على ناثان وفضل يردد شوية كلام غريب زي

" اسمع يا ناثان الى محبوبي ، واعمل كما يقول لك ، اسمع لمحبوبي شبتاي صبي " 

وكرر الكلام ده  ثلاث مرات  لما فاق واسترد وعيه قال للناس ان شبتاي هو ملك اسرائيل وهو المخلص لهم …

بعد كدة وبعد مرور أيام طلع ناثان بحدوتة جديدة وقال إنه عثر على ورقة هى جزء من رؤيا حاخام كان عايش فى القرن الـ12 وكان مكتوب فى الورقة اللى هى الرؤيا :

أن شخصا اسمه شبتاي صبي سيولد لمردخاي في عام 1626 م وسيكون هو المسيح الحق الذي سيكون خلاص اسرائيل على يديه وتكون مملكته ابدية

بعد كدة أعلنها شبتاي صريحة وقال إنه هو المسيح وسافر على تركيا لإتمام الدعوة أما ناثان فـ قعد فى غزة يدعو الناس للإيمان بـ شبتاي المسيح المخلص وفضل شبتاي وناثان يبعتوا ن رسايل للعالم كله إن خلاص الوقت حان وان المسيح المخلص شبتاي هيجمع كل اليهود فى أرض فلسطين

وكبرت الدعوة .... وزاد عدد المؤمنين بـ شبتاي لدرجة إن اليهود صدقوا الكدبة وكانوا بيدعوا لـ شبتاى في صلاواتهم  على إنه فعلا ملكهم ومسيحهم المخلص حتى إن الدعاء في معبد هامبورج اليهودي كان

" اللهم يا ناصر الملوك وصانع الأمراء بارك لنا حاكمنا الملك الصالح شبتاي صبي مسيح رب يعقوب "  

ووصل الحال بـ شبتاي إنه يقسم الأرض بلاد ويعين ملوك عليها كمان ، وبالمرة كان ليه أخوين إتنين أعطى لكل واحد منهم نص الأرض وخلاه ملك عليها وسماه ملك الملوك

أما حياة شبتاي العائلية فكانت طبعاً غريبة جدا ، فهو تزوج مرتين ومقربش من أي واحدة فيهم ، وطلقهم ،

 وكان أصحابه بيفسروا ده بأنه نوع من الطهارة والتبتل ، ولما الناس كانت بتسأله انت ليه ماتجوزتش لغاية دلوقتي يا شبتاي ؟؟ 

 يرد عليهم ويقول .... 
إن الروح القدس قد اوحى له بإن زواجه من المراة المناسبة لم يحن بعد .....

أما سارة زوجته الثالثة فـ سماها ملكة فلسطين ، والحقيقة الست دي كانت هي كمان عجيبة شويتين ، لأن كان بيتحكي عنها حكايات غريبة زي أنها كانت بتتنبأ للناس بالمستقبل  ، وكانت بتقول ان ملاك ظهر ليها  ، وقال لها إنها هتكون زوجة المسيح المخلص ..

المهم زاد عدد المؤمنين والتابعين لـ شبتاي وهو كمان زاد فى إدعاءاته وإفتراءاته ،  لدرجة أنه حلل قتل أي يهودي لا يؤمن بدعوته وقال إن القاتل " يثاب على عمله وتلحقه بركة دائمة " وكان بيوقع رسائله مثل " ابن الله البكر " و " ابوكم اسرائيل " وكذلك " انا الرب إلهكم شبتاي صبي "

وكان شبتاي متأكد إن رسالته ودعوته مش هـ تتم إلا بالذهاب للـ قسطنطينية وإقناع السلطان محمد الرابع إن هو المسيح المنتظر ، وفعلا راح الباشا فى موكب كبير على القسطنطينية  ،

وإتقبض عليه هناك ،  ولما سأله الضابط عن إسمه ، رد شبتاي وقاله أنا راجل دين جاي من أورشليم ، وجاي أجمع تبرعات وصدقات لفقراء فلسطين ، لكن الكلام ده ماجابش نتيجة واتحبس شبتاي شهرين ،

ولما حان الوقت عشان يقابل السلطان ركبوا خبطت فى بعض ، وقال لأتباعه أنا خايف من المقابلة دي ، إستغربوا جدا من كلام شبتاي لأنه كان دايماً بيقول لهم إن الدولة العثمانية هتسقط على إيده وهيستلم هو الحكم قريب جدا !!

ولما فشل شبتاي في اقناع السلطان بقصة إنه الماشيح المخلص خاف وأنكر أنه المسيح ، وانه عبارة عن حاخام يهودي فقير ، ومافيش أي حاجة فيه تميزه عن غيره ،لكن السلطان طبعاً معجبوش الكلام ، وقرر إنه شبتاي لازم يتعاقب على الأقل لأنه آثارالإضطرابات ،

وعندها عرض على شبتاي الاسلام وكان جوابه بأنه يسعده أن يكون مسلما اختيارا ودون اكراه من أحد ،

وفعلاً ... أشهر شبتاي إسلامه قدام السلطان ، ودخل الحمام ، وبدل هدومه ، ولبس العمامة

أما ناثان ففسر التحول الكبير ده بإن دخل عالم المسلمين عشان يحطمهم لا لكي يخلصهم وهذا سر الاسرار ، لأن تظاهر شبتاي بالاسلام يثبت إنه هو المسيح المخلص والدليل  أن "موسى المخلص الأول عاش في قصر فرعون متبعا دين الفراعنة ظاهرا ومبطنا دينا آخر"

بعد كده أسلم كتير من أتباع شبتاي حتى ممثلوا قبائل اسرائيل الإثنى عشر أعلنوا إسلامهم  بنفس الطريقة ونفس الحيلة – إسلام من الظاهر ويهودية من الباطن- ودي كانت البذرة الرئيسية والنواة الاولى لطائفة الدونمة

ولأن شبتاي كان ليه أعداء ومعارضين كتير وخصوصاً الحاخامات اللى فتنوا عليه ،  وسربوا أخبار بتقول إن شبتاي كان قاعد هو وأتباعه لابسين اللباس اليهودي وحولهم النساء والخمر وبينشدوا الاناشيد اليهودية ،

وكانت الحادثة دي كافية لنفى شبتاي لمدينة دولسينجو فى ألبانيا وفضل شبتاي عايش هناك لغاية وفاته سنة 1676 م

تعريف بسيط لطائفة الدونمة

كلمة دونمة بالتركية يعني العائدون أو الراجعون ، وكمان زي ماانتوا شايفين كدة ، دي أصلا فرقة يهودية أعلنوا اسلامهم ، وتخلوا عن أسمائهم اليهودية  ،وغيروا هدومهم ولبسوا ملابس المسلمين ، لكن فضلوا يمارسوا العقيدة اليهودية فى السر

والغريب ان كان ليهم سلطة وقوة ونفوذ داخل الدولة العثمانية  ، لدرجة إن فى أقوال بترجح إن السلطان عبد الحميد كان بيخاف منهم  ، وكان حزر جدا معاهم ومكانش بيأذي أى حد منهم ،

وامتد نفوذهم للوظايف الكبيرة فى الدولة العثمانية زي مثلاً ابراهيم غلانته اللى كان عضو فى مجلس الأمة وكان أستاذ في جامعة اسطنبول ،كمان كان فيه نسيم مصلياح ممثل مدينة أزمير فى مجلس الامة ، وحقى باشا السكرتير الخاص لرئيس الوزراء ، ومحمد جاود بك وزير المالية ،حتى إن مصطفى كمال أتاتورك مؤسس العلمانية التركية كان من يهود الدونمة ،

أما فى العصر الحديث فـ هنلاقى إن زوجة رئيس وزراء تركيا السابق بولند اجاويد السيدة رحشان ارال هي من الدونمة وكانت رئيسة حزب الشعب الجمهوري ،

وكمان أم السيدة تانسو جلر رئيسة وزراء تركيا فى التسعينات من الدونمة برضه

 بكدة بقي .....  يبقي عرفنا ليه العلاقات التركية اللإسرائيلية متينة و زي الفل ، وعرفنا كمان ليه تركيا كانت من أوائل الدول اللى اعترفت بإسرائيل ، وعرفنا كمان ليه الحجاب بيتحارب في تركيا !!!

ولازال أتباع شبتاي مستنيين عودته من جديد ولسة بيدعوا ويرددوا ويقولوا

" اللهم ، اله الحق ، االه اسرائيل ، الذي يسكن مجد اسرائيل ، ارسل لنا المخلص العادل منقذنا شبتاي صبي وعجل في ظهوره في أيامنا هذه آمين "